السيسي وعادل لبيب ومحافظ الكورنيش
عادل لبيب رئيس مباحث امن الدولة سابقا في عهد المخلوع ومحافظ الاسكندرية سابقا في عهد المخلوع ايام ثورة ٢٥ يناير حيث قام اثناء وجوده كمحافظ للإسكندرية بتحويلها الي مدينة بدون ارصفة لانه قرر تغيير وتعلية الارصفة في كل مكان بدولة الفساد ايام مبارك ويابخته اللي اخد المناقصة وحفر اسكندرية كلها وعمل ارصفة جديدة علي مزاج عادل لبيب اللي هو الان وزير الادارة المحلية في عهد السيسي وأخذ اكثر من سنة لكي يقوم بنظام المحافظات الجديدة واختيار محافظين جدد واقنع السيسي ان رجل الاعمال هاني المسيري هو افضل الحلول فعادل لبيب خرج من الاسكندرية مطرودا ايام ثورة ٢٥ يناير ويعلم بصفته احد رجال مباحث امن الدولة ان الاسكندرية مدينة ثورية متمردة ضد الحزب الوطني وفي الانتخابات وقفت مع صباحي وليس لها ميول للنظام الحاكم فيجب ان يكون المحافظ شخصية وفية ولا يسرق الاضواء من النظام الحاكم ومن هنا كان ظهور محافظ الاسكندرية الذي اقتصر على 3 جولات، الأولى لزيارة مصابين من المجندين فى حادث مرورى بالطريق الصحراوى بمستشفى الشرطة، والثانية بزيارة لمكتبة الإسكندرية، والأخيرة لنجع أبو بسيسة، لبحث أسباب توقف أحد مشروعات الصرف الصحي.
انجاز المحافظ بتاع الماراثون في المنتزه هو كل ماحصلت عليه الاسكندرية حتي الان ،،،
الرياضة حلوة مفيش كلام ولكن السيسي هو المسؤول عن تعيين محافظ للكورنيش وحدائق المنتزه فقط وضيف علي نوادي الروتاري فقط لاغير ،،،
ومحافظ الاسكندرية ماخدش باله من الناس اللي نايمة علي البحر وهو بيجري طيب انزل غيط العنب ولا غيط الصعيدي او ادخل علي القصعي او ارجع لعزبة دَنا و اتمشي انت والمدام اللي خايفة عليك في شارع الترعة واشرب شاي في الحجر النواتية ،، ولو قرفان من شكل الاسكندرانية اطلع على الطبجية ولا مدينة العرايس او خش الكرنتينة فى الورديان و اطلع على الجبل فى كرموز و خش على شارع النيل او عند شارع خوفو كدة ورا المدافن يا سلام بقى لو هتدخل عند باب الخرفان اول شارع 8 ممكن تتخطف لو راكب العجلة بتاعتك وبدلة التدريب والنظارة الامريكاني ،،، هو انت فاكر اسكندرية كفر عبده ونادي سبورتنج ياعم المحافظ ،،، الاسكندرانية في معاناة يومية وانتوا عايشين في دنيا تانية وبلد تانية ،،،
الامن والقمامة أوليات ميكانيكي الحارة ،،، اي محافظ عاجز عن فرض الامن ورفع القمامة يجب عزله هو ومدير الامن من المحافظة ،، خاصة اذا كانت المحافظة هي العاصمة التانية بعد القاهرة ،،،،
خالد عبيد
Khaled Eibid
Alexmanhatten.com
alexmanhatten 